Qadring baland bo‘lsin, ona tilim

Qarshi davlat texnika universiteti “Nuriston” akademik litseyida “Qadring baland bo‘lsin, ona tilim” deb nomlangan tadbir bo‘lib o‘tdi. Tadbir Qarshi DTU “Nuriston” akademik litseyi yoshlar bilan ishlar bo‘yicha direktor o‘rinbosari N.Yoriqulovning so‘zlagan nutqi bilan boshlandi. So‘ng Nuriston akademik litseyi dotsenti F.Rajabov “Turli til bayramlari va tilimiz ko‘rki” mavzusida ma’ruza qildi. Unda dunyo aholisining katta qismi so‘zlashadigan 6 til: ingliz, arab, rus, fransuz, xitoy, ispan, shuning, turkiy xalq tillaridan ozarbayjon, qozoq, qirg‘iz tillari bayrami nishonlanish kunlari va sabablari, tilimizning ko‘rki bo‘lgan barqaror birikmalar, sinonimlar va boshqa til birliklari haqida nazariy-amaliy fikrlar keltirib o‘tildi. Tadbirda Qarshi davlat universiteti professori X.Jabborov tashrif buyurib, “O‘zbek terminologiyasining muammolari va yechimlari” mavzusida ma'ruza qildilar. Ma’ruzada o‘zbek tilida qo‘llanib kelayotgan terminlar hamda tilimizga o‘zlashayotgan yangi terminlarni milliylashtirib singdirish yo‘llari taklif etildi, shuningdek, tilimizning nufuzini oshirish bo‘yicha qilinayotgan ishlar, dunyo xalqlari orasidagi o‘zbek tilining o‘rni haqida gapirildi. Tadbirda o‘quvchilar tomonidan tayyorlangan tilimizni madh etuvchi she’rlar, milliy raqslar, “O‘zbekiston” qo‘shig‘i taqdim etildi. Tadbir so‘ngida o‘zbek tiliga oid qiziqarli savollar berilib, savollarga tezkorlik bilan javob bergan o‘quvchilarga ilmiy, badiiy kitoblar sovg‘a qilindi.